Sinnus de bidda

Ocannu puru sa Consulta de sa lingua Sarda de su comunu de Guspini at penta beni de arregallai imoi po paskixedda una strina pitica a is famillias de bidda e a  is  ki tenint praxeri de ligi in sardu una pagina de s’istoria nosta. Su tempus fut pagu, ma in d’unu pater et fillu s’est beniu a conca ca iat essi stara cosa bona sighit su surcu de is annus passaus, candu si fiant fatas unas cantu cartolinas istoricas de calincunu arrenconi ermosu de bidda nosta.

Sa Sardinnia totu tenit famini meda de connosci s’istoria cosa sua, ca est istada po tropu tempus scadescia, acovecada e arracracada de s’istoria natzionali. E pruscatotu bidda nosta, ca primu de is atras in nomini de su progressu  at depiu lassai a erdi s’eredeu fatu de costumus, lingua, traditzionis e istoria , ki is antigus nos anti lassau. Perou no s’est perdiu totu totu gratzias su ‘mprusu a s’atividadi de calincunu assotziu guspinesu ki de us cantus annus traballant po tenni bia e fai connosci a totus s’istoria, sa lingua, e totus is cosas bellas de bidda nosta.

   Mancu mali ca me is urtimus tempus is istitutzionis puru anti cumentzau a cumprendi s’importantzia de scoberri a nou is arrexinis nostas , ma sa cosa de fai est ancora meda, a partiri de sa lingua sarda stratallada malamenti de totus kene ‘ndi bogai peis. Ma torrendi a su traballu  de sa consulta, eus pentzau de fai dus sinnialiburus cum cuatru fotografias de monumentus aici nodius a sa memoria nostra. Is cambas de linna faint parti de su Patrimoniu Immateriali  de bidda nostra, mancai unu pagu giovunu, ma poidi serbiri meda a da presentai e fai connosci in totu sa Sardinnia, e po fintzas fora de istadu. Sa cresiedda de S. Maria est su bratzolu de s’istoria nosta, aundi is guspinesus de otuxentus annus e prus s’atobiant e agatant su momentu prus artu de divotzioni e de si intendi una comunidadi unida e in paxi. Is cannas de organu  de su cucureddu ‘e Tzepara funti su monumentu naturali prus antigu e prus importanti de bidda, ki de medas annus est abetendi a ‘ndi fai cosa nodira de fai connosci a totus. Sa bocia po urtimu est su monumentu ki me in custus tempus scurius e tristus poidi de avedas bessiri su simbulu de bidda nostra. S’annu ki benit funti 150 annus ki custa perda biri atobiai genti de onnia arratza, lingua e logu, genti benida su ‘mprus po traballu.

Totus funti staus arricius e trataus cun dinnidadi , medas si funti coiaus a bidda, e is ki funti torraus a bidda insoru tenint un arregoru durci e arreconnoscenti de is guspinesus.

Custa perda tenta comenti merescit (imoi fai prangi su coru a da biri giai sbandonada e mesu interrada), poidi diventai posta coment’est s’enna de sa bidda e logu de atobiu aundi totus  podint agatai arrespetu, dinnidadi, ospitalidadi. A s’acabu boleus cun is sinnialiburus fai unu cumbidu mannu a totus is guspinesus, a dus umperai po su ki serbint, po donnia sinnialiburu ki arricint cumporint unu bellu liburu, ca in bidda nostra nc’est abisongiu meda meda de ligi.

Bona paskixedda a totus.

Marino Melis

Lascia un commento

Il tuo indirizzo email non sarà pubblicato. I campi obbligatori sono contrassegnati *

*